تمہارا نام مصیبت میں جب لیا ہو گا

ہمارا بگڑا ہوا کام بن گیا ہوگا​

خدا کا لطف ہوا ہوگا دستگیر ضرور​

جو گرتے گرتے ترا نام لے لیا ہوگا​

دکھائی جائے گی محشر میں شانِ محبوبی​

کہ آپ ہی کی خوشی آپ کا کہا ہوگا​

کسی کے پاؤں کی بیڑی یہ کاٹتے ہونگے​

کوئی اسیرِ غم اُن کو پکارتا ہوگا​

کسی کے پلّہ پہ یہ ہونگے وقتِ وزنِ عمل​

کوئی امید سے مونہہ اُن کا دیکھتا ہوگا​

کوئی کہے گا دُہائی ہے یا رسول اللہ​

تو کوئی تھام کے دامن مچل گیا ہوگا​

شکستہ پا ہوں مرے حال کی خبر کردو​

کوئی کسی سے یہ رو رو کے کہہ رہا ہوگا​

زبان سوکھی دکھا کر کوئی لبِ کوثر​

جنابِ پاک کے قدموں پہ گِر گیا ہوگا​

ہزار جان فِدا نرم نرم پاؤں سے​

پکار سن کے اسیروں کی دوڑتا ہوگا​

عزیز بچہ کو ماں جس طرح تلاش کرے ​

خدا گواہ یہی حال آپ کا ہوگا​

کہیں گے اور نبی اِذھَبُواِلیٰ غَیری​

مرے حضور کے لب پر اَنا لَھَا ہوگا​

دعائے امتِ بدکار وردِ لب ہوگی​

خدا کے سامنے سجدہ میں سَر جھکا ہوگا​

غلام اُن کی عنایت سے چین میں ہونگے​

عَدو حضور کا آفت میں مبتلا ہوگا​

میں اُن کے در کا بھکاری ہوں فضلِ مولیٰ سے​

حسن فقیر کا جنت میں بسترا ہوگا​