میں لبھ کے لیاواں کتھوں سوہنا تیرے نال دا​

حُسن وی غلامی کرے، عشق تیرا پانی بھرے​

چن سینہ چیر دیوے انگلی اشارہ کرے

جیہڑا اونہوں ویکھے، پھرے دل نوں‌سنبھال دا​

میں لبھ کے لیاواں کتھوں‌سوہنا تیرے نال دا​

تیریاں تے صفتاں دا کوئی وی حساب نئیں ​

توں تے کتھے تیریاں غلاماں داجواب نئیں

حُوراں نوں تو روپ ونڈیں حبشی بلال دا​

میں لبھ کے لیاواں کتھوں سوہنا تیرے نال دا​

پوچھ لے حدیث کولوں، پچھ لے قرآن توں​

گلیاں مدینے دیاں ودھ نیں جہان توں

ایسا روضہ ویکھیا نہ کسے لج پال دا​

میں لبھ کے لیاواں کتھوں سوہنا تیرے نال دا​

اسی کی ظہوری نالے ساڈا کی بیان اے​

ساریاں توں وڈّا نعت خوان تے قرآن اے

سورتاں سیپارے رنگ سوہنے دے جمال دا​

میں لبھ کے لیاواں کتھوں سوہنا تیرے نال دا​

دنیا تے آیا کوئی تیری نا مثال دا​

میں لبھ کے لیاواں کتھوں سوہنا تیرے نال دا​