اے رونقِ بہارِ گُلتسانِ ہست و بُود !

کیا اوجِ لا شریک تھا معراج کا سفر

گردِ رہِ یقیں تھی امکاں گہِ صعود

تجھ ہی سے فیض یاب فقیرانِ بے نوا

تیرے ہی ریزہ خوار یہ سب صاحبانِ جُود

جس میں ثنا کی کشتئ قرطاس ہے رواں

کتنی سخن نواز ہے احساس کی یہ رُود

تیری ادائے ناز کا پرتَو ہے بندگی

تجسیمِ حرفِ نعت ، مرے قعدہ و سجود

آئی ہے ترے شہر سے ہو کر نسیمِ صبح

گُلشن میں بانٹتی ہُوئی خیراتِ مُشک و عُود

احرام پوش ہیں مرے جذبوں کے زاویے

جب سے حریمِ شوق میں ہے نعت کا ورود

احساسِ عجزِ تھا مرے حرف و بیان کو

دل محوِ شوقِ نعت رہا ، اس کے باوجود

طاقِ خیال میں ہے فروزاں چراغِ نعت

ہالے میں نُور کے نہیں آلودگیٔ دُود

نسلوں سے انسلاکِ عقیدت ہے استوار

تجھ پر سلام اور تری آل پر درود

مقصودؔ اُس کریم کی بندہ نوازیاں

شوقِ سخن کو بخشا گیا نعت کا خلود