محفوظ وہ رہا جو دریچہ نہیں بچا

بازیگرانِ شہر سیاست ہوئے خموش

اب دیکھنے کو کوئی تماشہ نہیں بچا

کیسی چڑھی ہے دھوپ سرِ شہر بد لحاظ

برگد ہرے بھرے ہوئے سایا نہیں بچا

پھیلاؤ کی ہوس بھرے دریا کو پی گئی

پانی چڑھا تو کوئی کنارہ نہیں بچا

بجھنے لگے چراغ مرے جسم و جان میں

دل میں لہو بقدرِ تمنا نہیں بچا

اک نقشِ لالہ رنگ تو رستے کو مل گیا

بیشک ہمارے پاؤں میں جوتا نہیں بچا

لگتا ہے یوں، یا واقعی قحط الرجال ہے

لوگوں کے درمیان حوالہ نہیں بچا

اہلِ ہوس کی حاشیہ آرائی سے ظہیرؔ

تاریخ درکنار صحیفہ نہیں بچا