شکرِ خُدا کہ نعت نگہ دارِ حرف ہے
ورنہ تو حرف خود ہی سُبک سارِ حرف ہے
واللہ ، تیرے نام سے ہے آبروئے نطق
واللہ ، تیری نعت سے پندارِ حرف ہے
تُو خامہ و بیاں کی ہے آخری طلب
تُو ہی کرم نواز و شرَف بارِ حرف ہے
اِک نام ہے جو کھولتا ہے بابِ معرفت
ورنہ تو سب حجاب ہے ، دیوارِ حرف ہے
کچھ یوں ہے لفظِ حمد پہ تعلیقِ حرفِ مِیم
جیسے کہ رَأسِ اَوج پہ دستارِ حرف ہے
جو دائرہ ہے حیطۂ تمدیحِ ناز کا
اِس سے بروں تو منظرِ ادبارِ حرف ہے
’’ غالب ثنائے خواجہ بہ یزداں گزاشتیم ‘‘
مقصودؔ میرا بھی یہی اقرارِ حرف ہے