سرورِ قلب و جاں ہے، ربِ ہست و بُود تُو ہی تُو
ہر اِک ذرے میں، ہر قطرے میں بھی موجود تُو ہی تُو ملائک اِنس و جاں عابد ہیں، بس معبود تُو ہی تُو زمانے سجدہ گاہیں، اے خدا مسجُود تُو ہی تُو
Category: قطعہ: مشہور اور بہترین قطعہ کا ذخیرہ
خدا ہم ورد و مُونس ہے، شفیق و مہرباں ہے
خدا کے نُور سے ماحول، تاباں و فروزاں ہے مُنور نُور سے اُس کے مکان و لامکاں ہے جو اُس کی حمد سے غافل ہے، راہ گم کردہ انساں ہے
اگر ہے جستجو رب کی رضا کی
خوشی مقصود ہے رب العلیٰ کی کرو خالق کی بھی جی بھر عبادت کرو خدمت بھی مخلوقِ خدا کی
خدا نے مجھ کو یہ اعزاز بخشا
مجھے سرکارؐ کا درباں بنایا محبت میرے دل میں اپنی ڈالی درِ محبوب پر مجھ کو بٹھایا
خدا قائم ہے دائم جاوداں ہے
وہ مخلوقات کا روزی رساں ہے خدا کی یاد ہے دل میں ظفرؔ کے خدا کے ذکر میں ہی اُس کی جاں ہے
نہ مال و زر، نہ تاج و تخت مانگو
نہ شان عالی، نہ عالی بخت مانگو خدا سے بس خدا و مصطفیٰؐ کی محبت ہر گھڑی ہر وقت مانگو
خدا کا نام میرے جسم و جاں میں
خدا کا نام ہے میری زباں میں خدا کا نام ہے روحِ رواں میں خدا کا نام قلبِ عاشقاں میں
خدا کی حمد میں رطب اللساں ہیں
مکیں سارے مکان و لامکاں ہیں ظفرؔ سارے زمانے سرخمیدہ ادب سے سرنگوں سارے جہاں ہیں
رحیم و مہرباں میرا خدا ہے
کرم کا سائباں میرا خدا ہے میں تپتی دھوپ میں بھی پرسکوں ہوں ظفرؔ سایہ کناں میرا خدا ہے
خدا سے ملنا چا ہو، بات یہ دل میں بٹھا لو
پڑے ہیں ٹھوکروں میں جو، اُنہیں بڑھ کر اُٹھا لو ہیں جو روٹھے ہوئے احباب، تم اُن کو منالو نہیں کوئی بھی جن کا، اُن کو تم اپنا بنا لو