تاسیسِ بلاغت ہے ترا گفتۂِ صافی

جب تیرا غضب رب کا غضب ہے ، تو یقیناً

ہے عفوِ خداوند شہا ! تیری معافی

تقلید تری مُثبِتِ معراجِ بشر ہے

تعلیم تری خوئے بہیمانہ کی نافی

کیا اوجِ تفقہ ترے بندوں کا ہے شاہا!

شامی ہے کوئی ، کوئی رضا کوئی قَرافی

ہر عیب سے روکا ہے تری شرعِ حسیں نے

میسِر ہو ، نجاست ہو ، کہ ہو ماہیِٔ طافی

ہر خصلتِ بد تیرے محاسن نے مٹائی

دھوکہ ہو ، فحاشی ہو ، کہ ہو وعدہ خلافی

اعجازِ لبِ شہ تو ہے اعجازِ لبِ شاہ

اَموات کے اِحیا کو ہے ٹھوکر یہاں کافی

ایمان معظم کا نہ چِھن جائے کریما !

تحفے سے رجوع آپ کی شاں کے ہے منافی

وابستۂِ اِفتا ہوں میں ویسے تو معظم

اور شعر نگاری ہے مِرا وصفِ اضافی