"​اے خاصۂ خاصانِ رسُل ! وقتِ دُعا ھے”​

اشکوں کی روانی سے عجب حشر بپا ھے

گھر گھر میں شب و روز فقط آہ و بُکا ھے

جس سمت نظر کیجے، عزا خانہ کُھلا ھے

کیا کاتبِ تقدیر ھمیں بُھول گیا ھے ؟؟؟

ھے سارا جہاں درپئے آزار ھمارے

بُجھتے ھی چلے جاتے ھیں اُمّت کے ستارے

نُقصان پہ نُقصان، خساروں پہ خسارے

دے دیجے دُعا تاکہ خُدا حال سنوارے

یہ وقت غُلامانِ محمد پہ کڑا ھے

اے سیّدِ لولاک ! دُھائی ھے دُھائی

مِلتی ھی نہیں غم کے اسیروں کو رھائی

اس دیس میں غالب ھے بھلائی پہ بُرائی

ھے برسرِ پیکار یہاں بھائی سے بھائی

ھر صحن میں ایک آدھ جواں لاشہ گڑا ھے

اے خاصۂ خاصانِ رسُل ! آپ پہ قُرباں

اُمّی و ابی، دولت و املاک، دل و جاں

کُچھ کیجے کہ پھرتے ھیں سبھی چاک گریباں

کُلفت کی دوا ھے نہ کوئی درد کا درماں

ھمدرد فقط آپ کا نقشِ کفِ پا ھے

آپ آئیں تو ساتھ آئیں محبت کی ھوائیں

گُونجَیں طَلَعَ البَدرُ عَلینَا کی صدائیں

مہکیں وَجَبَ الشُکرُ عَلَینَا سے فضائیں

چَھٹ جائیں غم و یاس کی تاریک گھٹائیں

اُمّید کا بس ایک یہی رستہ بچا ھے

اے خاصۂ خاصانِ رسُل ! وقتِ دُعا ھے