میں منتظر ہوں اگر آپ کی زیارت کا

سوال نامہ نیا ہاتھ میں تھما دے گا

میں حل نکالوں گا جب وقت کی بجھارت کا

اداسیوں کا الگ ذائقہ سہی لیکن

چکھا ہے ہم نے مزہ اک نئی شرارت کا

تمام رات ترے ساتھ جاگتا رہا ہے

ہمارا خواب ہے واقف تری بصارت کا

منافع درد کی صورت میں مل رہا ہے مجھے

بس ایک فائدہ ہے عشق کی تجارت کا

بدن میں آنکھوں کے در جا بجا نکل آئے

یہ کس نے بدلا ہے نقشہ مری عمارت کا

لپٹ نہ جائیں کہیں خار میرے دامن سے

اٹھاؤں حلف اگر پھول کی طہارت کا

مگر جو سوچ نکالی کمال کی تم نے

اگرچہ اور ہی مفہوم تھا عبارت کا

تراش کر میں نے پتھر کو دھڑکنیں کیا دیں

مچا ہے شور جہاں میں مری مہارت کا