بے خطر کہیے ، برملا کہیے
ان کو کونین کی بقا کہیے
مہرِ شفقت مہِ عطا کہیے
ان کو رحمت کا سلسلہ کہیے
کون ہے غم گسار ان کے سوا
ان سے ہی اپنا ماجرا کہیے
یہ دیارِ نبی کی مٹی ہے
ہر مرض کی اِسے دوا کہیے
میرے آقا ، مِرے شہِ دیں کو
وجہِ تخلیقِ دو سَرا کہیے
چاند یونہی نہیں ہوا روشن
اِس کو منگتا حضور کا کہیے
جو مقدر اجال دیتا ہے
اس کو آقا کا نقشِ پا کہیے
مظہرِ ذاتِ کبریا ہیں حضور
اْن کو قدرت کا آئِنہ کہیے
کہیے عترت کو جو سفینۂ نوح
میرے آقا کو ناخدا کہیے
اُن کے کوچے میں اُڑتے ذروں کو
آفتابوں کا قافلہ کہیے
قربِ مولا کی آرزو ہے اگر
نورؔ نعتِ شہ ھدیٰ کہیے