تسکینِ مساکیں ہے تِری شانِ کریمی
تالیفِ یَتَامٰی ہے تِری دُرِّ یتیمی
معراج کے دولہا کے لبِ قدس کے آگے
کیا چیز مسیحائی ہے ، کیا شانِ کلیمی
ہونا ہے تِرا باعثِ تردیدِ عذابات
گھیرے ہے دو عالم کو تِری شانِ رحیمی
کس واسطے ہے فرحتِ میلاد پہ جھگڑا ؟
جب یہ ہے مسلّم کہ ہیں وہ فضلِ عمیمی
تملیکِ ممالیکِ خدا سورۂِ کوثر
اور عَلّمَک واصفِ توسیعِ علیمی
کس بات پہ ہیں دال تِرے اسم کی "حا ” دال "؟
جبریلِ تعقّل سے سے ورا سدرۂِ میمی
اِک تیری ادا شارحِ صد دفترِ اخلاق
اِک حرف تِرا ماتنِ صد قولِ حکیمی
اَن تَحبَطَ اَعمَال” کا اندیشہ ہے ،رکھیے !
آوازِ تنفّس بھی درِ یار پہ دھیمی
اسمائے دو عالم ہیں اسی نام سے مشتق
میں اسمِ محمد کو کہوں مصدرِ میمی
لے ! دامنِ تحفیظ میں اے مُنجیِٔ آدم !
ایمان کہیں لے نہ اُڑے دزدِ رجیمی
ہیں تیرے نہاں خانۂِ انوار میں پنہاں
اشیائے وجودی ہوں کہ اجزائے عدیمی
ہر دورِ تشدّد میں بس اک نعت کا قلعہ
قطمیرِ درِ شاہ کو ہے کہفِ رقیمی
بس دید کا بس دید کا طالب ہے معظمؔ
منگتا کو نہ لا کہنا تِری طرز قدیمی