تیرے حضورِ ناز کبھی کا جھکا چکے

دیکھیں تو کیا چھپا ہے پسِ پردہِ فنا

ائے زندگی تجھے تو بہت آزما چکے

دم بھر کو دم بھی لیں تو نہیں اب مضائقہ

ہم دل کی دسترس سے بہت دور آ چکے

تم آ گئے ہو تو ہو چلو رقصِ مرگ پھر

یوں تو ہزار بار یہ کرتب دکھا چکے

سجدے ٹپک رہے ہیں ابھی تک جبین سے

گرچہ وہ آستان کبھی کا گنوا چکے

اک کھیل تو ملا ترے بے رنگ شہر کو

ہم کو ہمارے رنگ تماشہ بنا چکے

دشتِ جنوں میں لاکھ دراڑیں تھیں اور ہم

ایسی کسی دراڑ میں آخر سما چکے

اک نقشِ آرزو تھا کہ جس کی ہوس میں ہم

اپنے ہی خال و خد کی لکیریں مٹا چکے