اپنے محبوب کی نعتوں کا خزانہ دے دے

شہرِ مکّہ میں مجھے گھر کوئی مِل جائے یا پھر

شہرِ طیبہ کی مجھے جائے یگانہ دے دے

اُن کی نعلین کروں صاف یہی حسرت ہے

ربِّ عالم مجھے اِک ایسا زمانہ دے دے

نوکری تیری کروں آئینہ کرداری سے

اُجرتِ خاص مجھے ربِّ زمانہ دے دے

آج تک مجھ کو سنبھالا ہے کرم نے تیرے

جب میں گرنے لگوں آکر کوئی شانہ دے دے

ہو رضا جس میں تری اور تیرے پیارے کی

حمد اور نعت مجھے ایسی یگانہ دے دے

سادگی کا مجھے پیکر کہیں دنیا والے

زندگی ایسی ، مرے مولا ! شہانہ دے دے

حجِ مبرور کی حاصل ہو سعادت مجھ کو

حاضری کا مجھے اِک خاص بہانہ دے دے

یاد آتے ہیں مناظر وہی نوری مجھ کو

اُن مناظر کا مجھے آئینہ خانہ دے دے

آئینہ جیسا ہو کردار جہاں میں میرا

رحمتوں والا مجھے آب دے دانہ دے دے

ظلم سہتے ہیں فلسطینی نہتے بے بس

یہ ہیں بے گھر مرے مولا انہیں خانہ دے دے

خواہشِ طاہرؔ سلطانی یہی ہے مولا

عشقِ سرکارِ دو عالم کا خزانہ دے دے