فکر و فن، زندگی، شوق، خُو نعت ہے

دست بستہ مؤدب ہے میرا ہنر

طاقِ ادراک میں مشکبُو نعت ہے

ہے یہی وجہِ تسکینِ قلب و نظر

آشتی، روشنی، رنگ و بُو نعت ہے

کوئی صنفِ سخن راس آئے ہی کیوں

ہر سخن گستری، گُفتگُو نعت ہے

اوجِ حرفِ سخن ہے رہینِ ثنا

نطق اور صوت کی آبرُو نعت ہے

آنکھ سے قلب تک خواہشِ دید ہے

آنکھ سے قلب تک کا وضُو نعت ہے

دل کو سیراب کرتا ہے ذوقِ ثنا

دل میں بہتی ہوئی آب جُو نعت ہے

جس گھڑی میرے لب پر مصارع نہ ہوں

وردِ صلِ علیٰ ہُو بہُو نعت ہے

دو کریموں کا مجھ پر یہ احسان ہے

میری ہر سانس کی آرزُو نعت ہے

خاورِ نعت ہے ضو فشاں اوج پر

کو بہ کو روشنی، سُو بہ سُو نعت ہے

اُس کا لہجہ ہے شیرینیٔ انگبیں

وہ جو کہتا ہے اشفاق، تُو، نعت ہے