رسولِ اکرم پہ ان کے رب نے
کیا ہے یہ خاص اپنا احساں
کہ ان کی خاطر زمیں بنا دی
تمام تر سجدہ گاہ یکساں
پھر اس زمیں بھر میں پھیلنے کو
بنائی خالق نے ایک اُمَّت
کہ جو فقط اُس کا حکم مانے
اسی کی قائم کرے حکومت
زمیں کو منکر سے پاک رکھے
جہاں میں معروف عام کر دے
نبی سے جو کچھ نظام پائے
بپا یہاں وہ نظام کر دے
زمیں کو مسجد کی طرح رکھے
نظامِ مسجد کو خود سنبھالے
زمین کی تیرگی مٹا کر
بکھیر دے ہر طرف اُجالے
مگر یہ نکتہ سمجھ نہ پائی
رسولِ آخر کی خاص اُمَّت
کہ دیں کا مفہوم جاننے کی
ملی نہ اب تک بھی اس کو فرصت
نہیں ہے خیرالامم کو اپنی
بلندیوں کا خیال اب تک
ملا نہ بعدِ زوال اس کو
جہاں میں ویسا کمال اب تک
بتائے کون اس کو آج آ کر
یہ جادۂ دیں سے ہٹ چکی ہے
جو ملتِ واحدہ تھی پہلے
وہ آج فرقوں میں بٹ چکی ہے