ہر ایک شعر گلِِ زعفرانِ رحمت ہے

زمیں پہ آپ کا در آسمانِ رحمت ہے

اور اس سے آگے تو بس لامکانِ رحمت ہے

ہمارا دین شجر ہے وہ جس کی شاخوں کا

ہر ایک گل ہی گلِ عاشقانِ رحمت ہے

سمندروں میں ہوا بھی ہے کشتیوں کی کنیز

کہ ان کے ساتھ ترا بادبانِ رحمت ہے

سنور رہی ہے صباحت جو دستِ تیرگی پر

حنائے صبح نہیں یہ اذانِ رحمت ہے

قسم ہے اس کی حسیں رمزِ پیچ داری کی

وہ زلفِ تاب فگن ترجمانِ رحمت ہے

رکھا ہے ” رے”  کی رحیمی نے سر پہ ” میم” کا تاج

یہ میم حسنِ محبت ہے ، شانِ رحمت ہے

جو دانے دانے پہ جاری ہے تیرا وردِ درود

یہ اہتمام بھی اک کاروانِ رحمت ہے

غبارِ راہ پہ دل اس لئے بچھائے ہیں

حضور آپ کا ہر گام جانِ رحمت ہے

مدارِ قوت  حیدر ہے رمزِ عشق و وفا

جو ایک نانِ جویں ہے وہ نانِ رحمت ہے

حضور آپ کی ہستی ہے روشنی کا دیار

حضور آپ کا اسوہ جہانِ رحمت ہے