زبانِ عاصی پہ نام تیرا کرم نہیں ہے تو اور کیا ہے
ہے گلشنِ روح مہکا مہکا کرم نہیں ہے تو اور کیا ہے
اسی تمنا میں عمر بیتی کبھی تو جائیں گے ہم مدینے
خدا نے آخر وہ دن دکھایا کرم نہیں ہے تو اور کیا ہے
ہوئے ہیں سچی طلب سے عاری، فقط ہوس کے ہوئے پجاری
رواں ہے پھر بھی عطا کا دریا کرم نہیں ہے تو اور کیا ہے
سخی کے در پر تو جب بھی جا کر کسی نے دستِ طلب بڑھایا
طلب سے بڑھ کر دیا ہمیشہ کرم نہیں ہے تو اور کیا ہے
جلیل ان کی عطا کے صدقے ملا ہے اعزازِ نعت گوئی
ہے بے ہنر کو یہ اذن بخشا کرم نہیں ہے تو اور کیا ہے