حبیبِ کِبریا آئے مبارک ہو، مبارک ہو

ہمارے ناخدا، رُوحِ جہاں وہ محسنِ اعظم

امام الانبیاء آئے مبارک ہو، مبارک ہو

بہارِ خُلد لے کر اِس گُلستانِ عنایت میں

وہی بادِ صبا آئے مبارک ہو، مبارک ہو

کرم کی بارشیں بھی ہو رہی ہیں ذرّے، ذرّے پر

سخی مشکل کشا آئے مبارک ہو، مبارک ہو

فلک سے نور اُترا ہے فضائیں بھی منوّر ہیں

شہِ ارض و سما آئے مبارک ہو، مبارک ہو

پکارو! مرحبا! صد مرحبا! جشنِ ولادت میں

وہ احمد مجتبیٰ آئے مبارک ہو، مبارک ہو

زمانہ جستجو میں تھا اَزَل سے جن کے آنے کی

وہی خیرالواریٰ آئے مبارک ہو، مبارک ہو

حسینوں سے حسیں تر ہیں وہی نورِ مجسم بھی

جہاں کے دِلربا آئے مبارک ہو، مبارک ہو

سرِ تسلیم خم کر لو، نگاہوں میں ادب بھر لو

کہ فخرِ دوسرا آئے مبارک ہو، مبارک ہو

کریں گھر، گھر چراغاں بھی رضاؔ اب سارے دیوانے

سبھی کے پیشوا آئے مبارک ہو، مبارک ہو