محمد کے جلوے نظر آ رہے ہیں

حجابِ دوعالم اُٹھے جا رہے ہیں

درِ شہ پہ ہم یوں مٹے جا رہے ہیں

پئے زندگی، زندگی پا رہے ہیں

صبا کوئی پیغام طیبہ سے لائی

گلستاں کے کانٹے ِکھلے جا رہے ہیں

سنورتی ہے قدرت نکھرتی ہے فطرت

کچھ اس شان سے شاہِ دیں آرہے ہیں

نہ روشن ہو کس طرح یہ چاند سورج

درِ مصطفی سے ضیا پا رہے ہیں

وہ شمعِ حرم ہو کہ طورِ تجلّیٰ

حضور آپ ہی نور برسا رہے ہیں

دو عالم کے داتا نگاہِ کرم ہو

سگِ آستاں ٹھوکریں کھا رہے ہیں

صبیحِؔ سخن ور جو ُشہرت ہے تیری

کرم تجھ پہ سرکار فرما رہے ہیں