مقدر میرا چمکے گا درِ سرکار دیکھوں گا
مجھے بلوائیں گے آقا درِ سرکار دیکھوں گا
ہے دل میں آرزو کب سے سُنہری جالیاں دیکھوں
خدا نے بھی اگر چاہا درِ سرکار دیکھوں گا
سلاطینِ زمانہ بھی جبیں اپنی جھکاتے ہیں
اُسی چوکھٹ کا ہُوں منگتا درِ سرکار دیکھوں گا
لگے ہیں میرے آقا کے قدم طیبہ کی گلیوں میں
مُنّور ہے ہر اک ذرّہ درِ سرکار دیکھوں گا
ملائیک بھی جہاں شام و سحر بہرِ سلام آئیں
بلند اُس در کا ہے رُتبہ درِ سرکار دیکھوں گا
مِنارے مسجدِ نبوی کے دلکش اور نورانی
چمکتا صحن وہ پیارا درِ سرکار دیکھوں گا
وہ جنت کی حسیں کیاری وہ پیارا مِنبرِ اقدس
اُنہیں دل میں بسا لوں گا درِ سرکار دیکھوں گا
اگر سو بار بھی دیکھے کوئی نیت نہیں بھرتی
یہی ہر بار ہے کہتا درِ سرکار دیکھوں گا
ضیا سارے زمانے کو یقینًا دے رہا ہے جو
وہ روشن گنبدِ خضرا درِ سرکار دیکھوں گا
مجھے طیبہ میں آنا ہے مقدر جگمگانا ہے
یہی ارمان ہے دل کا درِ سرکار دیکھوں گا
ابوبکر و عمر فاروق ہیں جو اُن کے پہلو میں
سلامِ شوق ہو میرا درِ سرکار دیکھوں گا
جئے جاتا ہے دنیا میں اِسی امید پر مرزا
بُلاوا آ ہی جائے گا درِ سرکار دیکھوں گا