ہے سعیٔ حرف مگر اس میں روشنی ہی نہیں

وہ جس نے شعر و سخن کو بدن پہ اوڑھ لیا

اسے حروف کی عظمت کی آگہی ہی نہیں

نِہالِ فکر کو آب و ہوائے طیبہ میں

وہ تازگی ہے مُیسر جو پہلے تھی ہی نہیں

حروف مدح کے لکھ کر ہوا ہے یہ معلوم

سخن میں ایسی کبھی روشنی ہوئی ہی نہیں

میں نعت لکھ کے نئی کائنات دیکھتا ہوں

وہ جس میں جلوۂ تاباں کی کچھ کمی ہی نہیں

ہر ایک شے میں حقیقت کا رنگ پاتی ہے

نظر نے خاک کی جانب نگاہ کی ہی نہیں

حقیقتِ نبوی کون جان سکتا ہے

کسی کو قوتِ ادراک وہ ملی ہی نہیں

ہزار بار کی کوشش کے بعد یہ جانا

نبی کی، لفظوں میں عظمت سما سکی ہی نہیں

میں حرف لکھنے کا لاکھ اہتمام کر ڈالوں

ملال رہتا ہے مدحِ نبی ہوئی ہی نہیں

کبھی تو لفظ کی نیرنگیاں نہیں رہتیں

کبھی شعوریہ کہتا ہے روشنی ہی نہیں

مجھے بھی قربتِ رُوحُ الْقُدُس میسر ہو!

بغیر جس کے کوئی بات بن سکی ہی نہیں

عزیزؔ نعت رہے تازہ آگہی کی امیں

جو یہ نہیں تو سمجھ، مدح ہو سکی ہی نہیں