چن آمنہ دا آؤ اے نی! کہکشاؤ چپ کرو

کعبہ منات لات نوں اکھیں وکھا کے آکھدا

کعبہ مِرا اے آ گیا جھٹ دے خداؤ چپ کرو

محرم دلاں دا سُن لوو دل دے جہان آگیا

نی بلبلو ! غماں دے اج نہ گیت گاؤ چپ کرو

آ کے بزار وچ مِرا مُل نہ کرو وپاریو

سرکار دا غلام آں سِر نہ کھپاؤ چپ کرو

ایمان دے چمن دے وچ پھل رقص کردے آکھدے

گل آپ دی ہے تے کرو نئیں تے ہواؤ چپ کرو

دل چپ چپیتے پچھیا تے تری گلی دی چپ کہیا

اپنے لباں نوں سی لوو چپ چاپ آؤ چپ کرو

آقا دا روضہ سامنے اعجازؔ لب نوں چپ کرا

نہ لب نوں ، سانہواں نوں کہہ نہ شور پاؤ چپ کرو