یہ سب عشقِ نبی کی روشنی ہے

یہاں کیا کام اندھے وسوسوں کا

یہاں چشمِ عقیدت جاگتی ہے

طلبگارِ گلِِ عشقِ نبی ہوں

اثر میری دُعا کا شبنمی ہے

لبِ تیرہ پہ پھر وہ اسم چمکا

صباحت پھر ہویدا ہو رہی ہے

جمالِ مصطفےٰ خضرِ خرد ہے

یہاں معذور فکرِ سامری ہے

لبوں پر ثبت اک مُہرِ کشش ہے

تمنا پُر ضیائے اسودی ہے

ہوں سر تا پا فدا بادِ وطن پر

یہی ٹھنڈی ہَوا ان کو لگی ہے

یہ آئینہ سفینہ بن گیا ہے

ذرا پہلے بڑی بارش ہوئی ہے

وہاں کیا کام اندھے وسوسوں کا

جہاں چشمِ عقیدت جاگتی ہے

بہارِ وجہِ کُن سے زندگی کے

تنفس میں کلی مہکی ہوئی ہے

زیارت سے ہے اوجِ کج مقدر

زیارت ہی مری خوش قامتی ہے

درود آنکھوں کے ہونٹوں پر ہے گویا

محبت جس جگہ ہو بولتی ہے

ہے مثلِِ برق اک اشکِ ندامت

وگرنہ سست رَو کو اک صدی ہے

جبینِ حزن پر انکی گلی میں

شکن پڑنے سے پہلے سوچتی ہے