یہ شہر والے بھی توبہ تائب دکھائی دیں گے
وہ ایک جادو کرے گا ، غائب ، دکھائی دیں گے
ہماری آنکھوں پہ اسم پھونکا گیا ہے صاحب
ہمیں زمانے کے سب معائب دکھائی دیں گے
ہماری رائے ہے معتبر اس کو رد نہ کرنا
یہ مشورے عنقریب صائب دکھائی دیں گے
یہاں خدا کی تو ایک سنتا نہیں ہے کوئی
یہاں پہ سب ہی خدا کے نائب دکھائی دیں گے
مری کہانی میں اٹھنے والا ہے ایک پردہ
عجیب یہ ہے کہ سب عجائب دکھائی دیں گے
تو بات یوں ہے کہ مصلحت ہوگی وہ محبت
جسے محبت میں یہ مصائب دکھائی دیں گے