تنگئ رزق سے ہلکان رکھا جائے گا کیا
دو گھروں کا مجھے مہمان رکھا جائے گا کیا
تُجھے کھو کر تو تیری فِکر بہت جائز ہے
تُجھے پا کر بھی تیرا دھیان رکھا جائے گا کیا
کس بھروسے پہ اذیت کا سَفر جاری ہے
دُوسرا مرحلہ آسان رکھا جائے گا کیا
خوف کے زیرِاثر تازہ ہوا آئے گی
اب دریچے پہ بھی دربان رکھا جائے گا کیا
دَرد کا شَجرہ دِکھانے کے لئے مقتل میں
ساتھ خنجر کے نمک دان رکھا جائے گا کیا
چل ترا مان رکھا میں نے تقاضا چھوڑا
چپ رہوں گا تو مرا مان رکھا جائے گا کیا
مان بھی لے کہ تُجھے میں نے بہت چاہا ہے
دوست سَر پر مرے قرآن رکھا جائے گا کیا