دل میں اب کوئی ترے بعد نہیں آئے گا
سنگِ ارزاں تہِ بنیاد نہیں آئے گا
دن نکلتے ہی بُھلا دوں گا میں اندیشۂ روز
سرحدِ صبح میں شب زاد نہیں آئے گا
ایسے اک طاقِ تمنا پہ رکھ آیا ہوں چراغ
بجھ گیا بھی تو مجھے یاد نہیں آئے گا
حسنِ خود دار کو اِس دورِ خود آرا میں بہم
ہنر مانی و بہزاد نہیں آئے گا
طوقِ زرناب ہوئے زیبِ گلوئے گفتار
اب کہیں سے سخن آزاد نہیں آئے گا
فرقِ زندان و گلستان بھی سب دیکھ لیا
لب پر اب شکوۂ صیاد نہیں آئے گا
کھوج کس کی ہے تمہیں راہ نوردانِ فراق
اب کوئی قریۂ آباد نہیں آئے گا
عشرتِ سایۂ دیوار کی چالوں میں دگر
پائے درماندۂ افتاد نہیں آئے گا
اب کسی شعبدہ گر دامِ عنایت میں ظہیرؔ
یہ دلِ خوگرِ بیداد نہیں آئے گا