رب سے تاثیرِ برملا مانگی

تاج مانگا نہ تخت ہی مانگا

رب سے بس خیر کی دعا مانگی

رکّھی ظالم سے کب امیدِ کرم

ربِّ رحمٰن سے عطا مانگی

مانگی اپنے خدا سے درویشی

میں نے کب مخملی قبا مانگی

شام غربت کی بھی نہیں چاہی

اور نہ بوسیدہ سی قبا مانگی

خضر سی عمر بھی نہیں چاہی

نہ کوئی مسندِ صفا مانگی

چاہی بادِ صبا نہ رنگِ افق

نہ کبھی باغ کی فضا مانگی

قبر میں روشنی بھی چاہی ہے

اور کعبے کی نم فضا مانگی

راز داں ہو خطا معاف میری

چیز کیا چاہئے تھی کیا مانگی

ہم نے بزمِ خیال سے اپنی

لذتِ یادِ مصطفی مانگی

نعت حسانؓ جیسی میں بھی کہوں

رب سے رو رو کے یہ دعا مانگی