شکر صد شکر یوں بہار آئی
چل پڑی حریت کی پُروائی
ایک قائد کی رہنمائی میں
قوم کی قوم نے شِفا پائی
خوب تعبیر پائی خوابوں کی
ایک خطے کی عالم آرائی
شب غلامی کی ہم گزار چکے
صبحِ آزادیٔ وطن آئی
صبحِ آزادیٔ وطن کیسی
روشنی انبساط کی لائی
وہ مسرت ہے سارے چہروں پر
سارا عالم ہوا تماشائی!
جذبۂ حریت کے صدقے میں
ہم نے اک دل نشیں فضا پائی
آخرش مل گیا سکوں دل کو
سعیٔ اسلاف اپنے کام آئی
کاش ہو جائے یہ زمیں اب تو
’’روکشِ سطحِ چرخِ مینائی‘‘٭
اس زمیں سے اُگیں مہ و انجم
چپہ چپہ وہ پائے رعنائی
کاش مل جائے بچے بچے کو
قائدِ قوم کی سی بینائی
حشر تک ملک یہ رہے قائم
پائے ہر فرد ایسی دانائی
عِزّ و جاہ و حشم میسر ہو
ہم کریں تا ابد وہ دارائی
فتح مندی ہماری قسمت ہو
دشمنوں کے لیے ہو پسپائی
بن سکے اب عزیزؔ بھی یا رب
دین و دنیا میں حق کا سودائی
صبحِ آزادیِ وطن:٭غالبؔ،۲۹؍شوال۱۴۳۷ھ… مطابق:۳؍اگست۲۰۱۶ء