عاصی تو ہوں مگر مجھے الفت نبی سے ہے
دعوے کو نورِ صدق و صفا کی دلیل دے
حبِّ نبی کے صدقے میں ہو مغفرت عطا
اظہار کے لیے مجھے فکرِ جمیل دے
۰۰۰
میرا قلم ہو سیف کے مانند اور میں
شامل مجاہدینِ قلم میں سدا رہوں
سرکار کے طفیل سعادت ملے مجھے
میں تا حیات شعرِ عقیدت لکھا کروں
۰۰۰
حَیَّ عَلَی الثَّنا کی صدائیں لگاؤں میں
اخلاص کی کشش بھی ہو میری پکار میں
رُوْحُ الْقُدُس کی مجھ کو بھی امداد چاہیے
ہو فکر میری نورِ یقیں کے حصار میں
۰۰۰
مجھ کو جمالِ فن ہو عطا مدح کے لیے
جو کچھ بھی میں لکھوں وہ نہایت حسین ہو
سرکار کے جمال کو لفظوں میں ڈھال دوں
تحریر میری پرتوِ عین الیقین ہو
۰۰۰
ہر بات ہو سند کے مطابق مری درست
ہر حرف میں محبتِ آقا کا نور ہو
ہر لفظ، سچ کا آئینہ بردار ہی رہے
ہر شعر میں صداقتِ دیں کا ظہور ہو
۰۰۰
مدحت نگارِ سرورِ کونین کے لیے
یارب! تمام باب فصاحت کے کھول دے
شیرینیٔ کلام کی حاجت ہے حرف حرف
لفظوں میں شہد، حرفوں میں سچائی گھول دے
دعائے حرمِ نبوی مسجدِ نبوی شریف میں لکھی گئی۔
ہفتہ:[پاکستانی رویتِ ہلال کے مطابق]۱۲؍رجب ۱۴۳۶ھ۔۲؍مئی ۲۰۱۵ء