آپ اصلِ عالَمین اے رحمۃً لِّلعٰلَمِین !

آپ ذی قوت امین اے رحمۃً لِّلعٰلَمِین !

رب کے ہاں سب سے مَکین اے رحمۃً لِّلعٰلَمِین !

جنّتِ عزّت کے باسی ہیں تِرے شیدا شہا !

اور تِرا دشمن مہین اے رحمۃً لِّلعٰلَمِین

ہے فقط وہم و گماں سارا جہاں تیرے سوا

ایک تو جانِ یقین اے رحمۃً لِّلعٰلَمِین !

تیری رحمت سے مِلا جبریل کو بھی یہ شرف

رب سے کہلائے اَمین اے رحمۃً لِّلعٰلَمِین !

تیرے اَعدا ذی شمال اور تیرے شیدا حشر میں

ٹھہرے اَصحابِ یَمین اے رحمۃً لِّلعٰلَمِین !

نور کو تیرے نہیں سجدہ کیا تھا اس لیے

ہو گیا شیطاں لعین اے رحمۃً لِّلعٰلَمِین !

مہرِ حق ! تُو نے دیے دو چاند پاک و ہند کو

داتا اور خواجہ معین اے رحمۃً لِّلعٰلَمِین !

’’ یا ‘‘ سے رب نے دی ندا اور پِھر کہا ” سَیِّدِ تجھے

کُھل گیا یا اور سین اے رحمۃً لِّلعٰلَمِین !

مُصحفِ ناطِق ! تِرا ہر قول ،تیری ہر ادا

ہے ھُدًی لِلمُتَّقِین اے رحمۃً لِّلعٰلَمِین !

کَافۃ للنَّاس مُرسَل ہونا خاصہ ہے تِرا

اُمتی کُل عالَمین اے رحمۃً لِّلعٰلَمِین !

سب ترقی یافتہ اپنائے ہیں تیرے اصول

کوریا ہو یا کہ چین اے رحمۃً لِّلعٰلَمِین !

ہر جگہ جو حاضر و ناظر نہ ہو ، کیسے وہ ہو

رحمۃً لِّلعٰلَمِین !اے رحمۃً لِّلعٰلَمِین !

اے نشاطِ جاں معظمؔ بھی کرے چستی سے خوب

خدمتِ دینِ متین اے رحمۃً لِّلعٰلَمِین !