جان عالم صلی اللہ علیہ آلہ وسلم کے لیے احادیث شمائل میں ” وَاسِعُ الجَبِین ” ” کے الفاظ ہیں۔(یعنی کشادہ پیشانی مبارک والے) بطور ردیف نظم کرنے کی سعادت :
روشن تِری جبین ہے اے واسِعُ الجَبِین !
مِرآتِ عالمین ہے اے واسِعُ الجَبِین !
جانِ بہار ! تیرا خزاں کُش وہ اِبتِسام
فارِح گَرِ حَزِین ہے اے واسِعُ الجَبِین !
اصلِ خلیل ! تیرے ہی قَطعِ بُتاں کا فیض
ابنِ سبکتگین ہے اے واسِعُ الجَبِین !
تُو نے بَقا بَنات کو دی ، تیری ہی عطا
تربیَّتِ بَنین ہے اے واسِعُ الجَبِین !
یہ بھی تِرا خصوص بَہ نَصِّ حدیث ہے
مُسلِم تِرا قرین ہے اے واسِعُ الجَبِین !
تجھ سے طلب خدا سے طلب ، اس کے کب خلاف
اِیّاکَ نَستَعِین "ہے اے واسِعُ الجَبِین !
تیری اَدائے حُسنِ مَواعِظ میں خوب درس
بہرِ مُبَلِّغین ہے اے واسِعُ الجَبِین
بچپن میں نعت خواں تھا ، تو مجھ کو کہا گیا
بچّہ بڑا ذہین ہے اے واسِعُ الجَبِین !
عاشق ترا ہمیشہ معظمؔ ہے اور عدو
دارین میں مَہین ہے اے واسِعُ الجَبِین !
