نبی سے عشق ہمیں تا ابد ضروری ہے

سکونِ روح کی خاطر خدا کی حمد کے بعد

لبوں پہ نعت کا ہونا اشد ضروری ہے

جزائے کارِ محبت میں ان کے کیا کہنے

جنہیں بہشت سے ان کی سند ضروری ہے

کمالِ اشک کو لازم ہے سنگِ در ان کا

کہ جیسے پھول کا شبنم کو خد ضروری ہے

فزوں ہے جس سے یہ تعدادِ انبیا کا فروغ

ہر اک جمال میں وہ اک عدد ، ضروری ہے

تری بقا ترے مجموعہِ عدم سے ہے

طلب کا چھوڑ تردد ، رسد ضروری ہے

درِحبیبِِ خدا ہے سنبھل کے جانا ، وہاں

حیا ہے پہلا سلیقہ ، خرد ضروری ہے

تری اٹھان تو مضمر ہے تیرے جھکنے میں

نسب وہاں پہ ہے لازم نہ قد ضروری ہے

خلافِ حکمِ نبی دل میں خواہشِ دنیا

قدم اٹھائے تو پھر اُس کا رد ، ضروری ہے

خدا سے کہہ کے وہ بھجوائیں گے ابابیلیں

انہیں لگے گا جہاں پر مدد ضروری ہے

یہ میم حمد بھی کرتی ہے اور محبت بھی

تبھی تو نامِ محمد پہ شد ضروری ہے

تو چاہتا ہے کہ مٹی بھی تیرے بوسے لے

تو پھر درود تجھے تا لحد ضروری ہے

درود پڑھتے ہیں اور تیرا اسم چومتے ہیں

کہ ہر مقام پہ تیری مدد ضروری ہے