نہ مال و زر نہ سفارش کوئی لگانے سے
مدینے جاتے ہیں سب آپ کے بلانے سے
مساء و صبح میں کہتا ہوں یانبی ادرک
ملے گی خلد یقیناً اِسی ترانے سے
بسا ہے جب سے مری آنکھ میں ہرا گنبد
نظر کو پھیر لیا میں نے اس زمانے سے
کریم ایسے کہ ان کو بھی بس دعائیں دیں
جو باز آتے نہ تھے آپ کو ستانے سے
نبی ہیں ، فاطمہ ، حیدر ، حسن ، حسین بھی ہیں
گھرانہ کون سا بہتر ہے اِس گھرانے سے
بروزِ حشر جسے آپ اذن دیں آقا
کسے مجال کہ روکے جناں میں جانے سے
بقیعِ پاک میں مدفن حضور دے دیجے
قمرؔ کی خاک لگے اس طرح ٹھکانے سے
