فقط بے شماری ہے جس کا شمار​

وہ کیا ایک خالق ہے نامِ خدا​

نہیں جس کا ثانی کوئی دوسرا​

وہ کیا ایک رازق ہے روزی رساں​

کہ ہے جس کا محتاج سارا جہاں​

وہ کیا ایک قادر ہے ربِ قدیر​

خبر گیرِ حالِ صغیر و کبیر​

وہ کیا ذات ہے حضرتِ پاک ذات​

کہ ہیں ذات سے جس کے ظاہر صفات​

بہر جا و ہر ملک و شہر و دیار​

پرستش کے لائق ہے وہ کردگار​

بہر ابتدا ہے وہی ابتدا​

وہی ہے بہر انتہا انتہا​

وہ ہر ایک صورت میں موجود ہے​

وہ ہر ایک ملت کا معبود ہے​

وہ ہر ایک کو رزق دلواتا ہے​

لکھا اُس کی قسمت کا پہنچاتا ہے​

کسی کو بھی خالی نہیں چھوڑتا​

رخ اپنا کسی سے نہیں موڑتا​

جو ہیں جن و انسان و وحش و طیور​

بد و نیک، خورد و کلاں، مار و مور​

اُسی ایک سے پرورش پاتے ہیں​

اُسی ایک کے بندے کہلاتے ہیں​

وہ ہے سب کی مشکل کا مشکل کشا​

وہ ہے سب کی حاجت کا حاجت روا​

بندھا ذاتِ واحد پہ جس کا یقیں​

دوئی اُس کے پھر دل میں رہتی نہیں​

خبر گیرِ عالم، خدائے کریم​

خداوندِ رحماں، غفور الرحیم​

اُسی سے ہے روشن چراغِ جہاں​

اُسی سے ہے سرسبز باغِ جہاں​

بہ تعریف و توصیفِ پروردگار​

بہ تشریحِ ذاتِ خداوندگار​

کرے کیا بیاں ہندیِؔ کم زباں​

کہ ہے طول توحید کی داستاں​