اردوئے معلیٰ

Search

ضیائے کون و مکاں لا الٰہ الا اللہ

بنائے نظمِ جہاں لا الٰہ الا اللہ

 

شفائے دردِ نہاں لا الٰہ الا اللہ

سکونِ قلبِ تپاں لا الٰہ الا اللہ

 

نفس نفس میں رواں لا الٰہ الا اللہ

رگِ حیات کی جاں لا الٰہ الا اللہ

 

بدستِ احمدِ مرسل بفضلِ ربِّ کریم

ملی کلیدِ جناں لا الٰہ الا اللہ

 

دلوں میں جڑ جو پکڑ لے تو برگ و بار آئیں

ابھی ہے زیرِ زباں لا الٰہ الا اللہ

 

ہے تار تار اسی سے تو چادرِ ظلمت

چراغِ نور فشاں لا الٰہ الا اللہ

 

شجر حجر ہوں کہ جنّ و بشر کہ ماہی و مرغ

سبھی کے وردِ زباں لا الٰہ الا اللہ

 

سرور و کیف و حلاوت نظرؔ جو ہے درکار

صباح و شام بخواں لا الٰہ الا اللہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ