حصارِ ضبطِ فغاں سے نکل چلا کوئی

نہ کوئے یار میں آوارہ کوئی دیوانہ

نہ بزمِ یار میں باقی ہے منچلا کوئی

بدل گیا ہے سراسر مزاجِ اہلِ جنوں

نہ شوقِ مرگ نہ جینے کا ولولہ کوئی

سلامت آ گئے مقتل سے غازیانِ عشق

نہ سر گرے ہیں نہ خیمہ کہیں جلا کوئی

عجیب راہئ حق ہیں وہ جن کی راہوں میں

کوئی دمشق، نہ کوفہ، نہ کربلا کوئی

وہی تو جادۂ منزل ہے رہروانِ وفا

وہ رہگزار کہ جس پر نہیں چلا کوئی

فدائیانِ محبت کی بیعتیں ہیں الگ

امیر شہر سے کہہ دے یہ برملا کوئی

مآلِ کلمۂ حق سے ظہیؔر ڈر کیسا

صلیب و دار پہ مرتا بھی ہے بھلا کوئی