جو کم نگاہ تھے وہی اہلِ نظر بنے
ہم کو ہمارے دیدۂ بینا سے کیا ملا
Category: شاعری
ہجرت کی منزلوں میں ہر اک خاندان کی
اک نسل مطمئن ہے مگر اک اداس ہے
گزرا جو پاس سے تو کلی دل کی کِھل گئی
میرے لیے تو بادِ صبا ہو گیا وہ شخص
کیسے ترسیلِ سخن کی کوئی صورت نکلے
یہ زباں میری نہیں ہے نہ یہ لہجہ میرا
کیا شامِ آرزو سے مبارکؔ کریں امید
ہم کو بہارِ صبحِ تمنا سے کیا ملا
بدن سے لپٹے رہے بے زمینوں کے عذاب
تلاشِ رزق کی خاطر جدھر جدھر بھی گئے
یہ جان کر کہ محبت نہیں مروّت ہے
ہم التفاتِ دلِ دوستاں سے دور رہے
کیوں میری جڑیں جا کے زمیں سے نہیں ملتیں
گملے کی طرح صحن میں رکھا ہوا کیوں ہوں؟
شہریت کھو چکا تیری مگر اے ارضِ وطن
” میں گیا وقت نہیں ہوں کہ پھر آ بھی نہ سکوں ”
غمِ فراق بھی ہے اور سکونِ قلب بھی ہے
جُدا ہوا ہے کوئی جیسے عمر بھر کے لیے