اردوئے معلیٰ

Search

آخرش لمحہِ موجود سے معدوم ہوئے

ہم کہ اک لمحہِ ناپید میں جینے والے

 

اک مسیحائے گریزاں کا تصور کر کے

زخم تادیر سلگتے رہے سینے والے

 

ہم کو آتے ہیں بلاوے کہیں گہرائی سے

کب تلک تھام کے رکھیں گے سفینے والے

 

عمرِ بے ربط ، کہ ترتیب سے عاری ٹھہری

ہم سے ہوتے ہی نہیں کام قرینے والے

 

ایک تو چاکِ گریبان پہ خوش ہیں ہم بھی

دوسرے تم بھی نہیں چاک کو سینے والے

 

ہائے کس کرب کے عالم سے نہ گزرے ہونگے

کوئی سقراط نہ تھے زہر کو پینے والے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ