اردوئے معلیٰ

Search

اس کو ہے دو جہان کی راحت ملی ہوئی

جس کو ہے میرے شاہ کی چاہت ملی ہوئی

 

ان کو قسم خدا کی ہے جنت ملی ہوئی

جن کو شہِ امم کی ہے قربت ملی ہوئی

 

جو آلِ مصطفی کو ہے عظمت ملی ہوئی

وہ اور بھی کسی کو ہے رفعت ملی ہوئی؟

 

ہیں بادشاہ دیکھ کے حیرت سے دم بخود

ان کے فقیر کو ہے وہ عزت ملی ہوئی

 

میں بھی تو ہوں غلام دیارِ حبیب کا

میری بھی ہے حضور سے نسبت ملی ہوئی

 

آتی ہے روز چوم کے روضہ حضور کا

بادِ صبا کو خوب ہے قسمت ملی ہوئی

 

ہوتی ہے صِرف ان کی مدینے میں حاضری

جن کو حضور سے ہو اجازت ملی ہوئی

 

ہوتی ہے صَرف مدحِ خدا و رسول میں

آصف مجھے ہے جتنی بھی طاقت ملی ہوئی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ