اِسی میں چھُپ کے بلکنا ، اِسی پہ سونا ھے

اِسی میں چھُپ کے بلکنا ، اِسی پہ سونا ھے

تمہارا غم ھی مرا اوڑھنا بچھونا ھے

 

بس ایک پھُول سے لمحے کی آرزو میں ھمیں

تمام عُمر محبت کا بوجھ ڈھونا ھے

 

کہیں کہیں سے ھے شیریں ، کہیں کہیں نمکین

وہ شکر لب جو ذرا سانولا سلونا ھے

 

مری یہ دُھن ھے بطورِ نگاہ دارِ جمال

کہ تجھ کو آنکھ میں ، پھر شعر میں سمونا ھے

 

جو میرا ھو وہ کسی اور کا نہیں رھتا

بس اِتنا جان لے جس کو بھی میرا ھونا ھے

 

جھٹک تو دُوں مَیں اِسے خواب گاہ سے باھر

مگر یہ چاند مری نیند کا کھلونا ھے

 

ھنسی ھنسی میں تجھے الوداع کہہ کے ھمیں

تمام عُمر کہیں چھپ کے رونا دھونا ھے

 

ھوائے شام اگر سازگار ھو تو مجھے

کسی کے دِل میں محبت کا بیج بونا ھے

 

تمہارے میرے علاوہ ھے تیسرا بھی کوئی

تمہارا میرا تعلق عجب تکونا ھے

 

ھنوز پہنچا نہیں ھوں مَیں اُس بلندی تک

جہاں سے گِر کے مجھے پاش پاش ھونا ھے

 

بڑی عجیب سی ھیں میری خواھشیں ، مثلاَ

بجائے گُل ترے بالوں میں دِل پرونا ھے

 

تری کلائی میں شیشے کی چوڑیاں ھی سہی

ترا سراپا تو سارے کا سارا سونا ھے

 

ابھی سے تان لِیں یاروں نے چھتریاں فارِس

ابھی تو درد کی رِم جھم نے من بھگونا ھے

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ