اردوئے معلیٰ

آنکھ پتھرائی ہُوئی ہے اب کہیں اندر اُتر

شیشۂ دل میں اے عکسِ گنبدِ اخضر اتر

 

جذب کے امکان میں لا،اب کوئی موجِ طرب

خواب کے احساس میں اے منظرِ خوشتر اُتر

 

اُن کو آنا ہے نئے لمحوں کی آرائش کے ساتھ

میرے آنگن میں سحَر اب صورتِ دیگر اُتر

 

سوچ بے خود، سَر نہفتہ، حرفِ مدحت منفعل

نقشِ نعلینِ کرم تُو جادۂ دل پر اُتر

 

قاسمِ جنت کے ہاتھوں میں ہے بخشش کا بھرم

دیر ہے کس بات کی اے تلخیٔ محشر اُتر

 

وہ تو ہر اوجِ سخن کی وسعتوں سے ہیں ورا

اے مرے جذبِ رواں ! تُو، تو مرے اندر اُتر

 

فاصلے سے ٹُوٹ جاتا ہے تسلسل کا خمار

منظرِ دیدِ مسلسل آنکھ میں آ کر اُتر

 

مَیں اُسے پھر جوڑ لوں گا نعت کی تدبیر میں

آ کوئی حرفِ طلب ! جبریل کے پَر پر اُتر

 

اِس زمینِ شعر میں مشکل ہے مدحت کی نمو

حرف کے امکان پر اے دیدۂ اختر اُتر

 

صبح باندھوں گا مَیں تجھ کو مقطعِ نعتِ نبی

روشنی کے مطلعِ اظہار پر شب بھر اُتر

 

حاصلِ نظمِ دو عالم، جلوئہ مقصودِؔ کُن

بہرِ تکمیلِ سخن ادراک کے اوپر اُتر

 

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ

اردوئے معلیٰ

پر

خوش آمدید!

گوشے۔۔۔

حالیہ اشاعتیں

اشتہارات

اشتہارات