اردوئے معلیٰ

Search

آپ کے عشق سے منسوب ہوا خوب ہوا

دل کا کیا ہے دلِ مجذوب ہوا خوب ہوا

 

غیر کی مدح سرائی نہیں ہو گی مجھ سے

ان کی مدحت مرا اسلوب ہوا خوب ہوا

 

آپ کے در کی غلامی کے تو کیا ہی کہنے

آپ کا مجھ پہ کرم خوب ہوا خوب ہوا

 

نعت کہنے کی بدولت ملی مجھ کو عزت

اس عنایت سے میں محبوب ہوا خوب ہوا

 

حشر کی فکر نہیں زاہدِ خود رفتہ کو

جب سے یہ آپ سے منسوب ہوا خوب ہوا

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ