اگرچہ یہ چاند پر کسی آدمی کا پہلا قدم نہیں ھے
مگر ترے در پہ میرے پہلے قدم کا چرچا بھی کم نہیں ھے
ھمارا غم مُلک بھر میں پَھیلا ھے، کونسی آنکھ نم نہیں ھے
ھمارے بندھن کا ٹوٹ جانا سقُوطِ ڈھاکہ سے کم نہیں ھے
تُو عشق بھی ھے عقیدہ بھی ھے، مَیں تیری خاطر لڑُوں گا سب سے
جو تُجھ کو اچھا نہیں سمجھتا، مِرے لیے مُحترم نہیں ھے
مزے سے کُھل کر گلے لگاؤ کہ کوئی خود کُش بلا نہیں ھم
ھمارے سینے میں صرف دِل ھے، ھمارے سینے میں بم نہیں ھے
تُو خود مُجھے اپنی زندگی سے نکال پھینکے تو میری قسمت
وگرنہ پیارے ! کسی بھی مائی کے لال میں اتنا دم نہیں ھے
مُجھے سخن بعد میں سکھالینا، پہلے جُملہ تو ٹھیک کرلو
درست ترکیب ھے براہِ کرم، برائے کرم نہیں ھے
تُو خود کو شاہِ سخن سمجھ کر اِنہیں کنیزیں نہ جان، پیارے
یہ سادہ دل لڑکیوں کی اک جامِعَہ ھے، تیرا حرَم نہیں ھے
حُسَین تو خُوب جانتے ھیں کہ اُن کے عُشّاق کے گھروں میں
کچھ ایسے گھر بھی ھیں جن کے ماتھے پہ پنجتن کا علَم نہیں ھے
میاں مصوّر ! ابھی یہ شہکار نامکمل ھے، پھر سے دیکھو
کہ خوشبوئیں پھول سے الگ ھیں، درخت شاخوں میں ضم نہیں ھے
اگر مَیں اھلِ ھوَس میں ھوتا تو چند بوسوں پہ رُک نہ جاتا ؟
مَیں عشق والا ھُوں اور میری لُغت میں ھی لفظ “تھم” نہیں ھے
کسی کی بس اک جھلک کی خاطر تُو جان دینے چلا ھے فارس
عجیب عاشق ھے، کچھ حیا کر، یہ بھاؤ تو کافی کم نہیں ھے ؟؟؟
