اردوئے معلیٰ

Search

اے شہنشاہِ مدینہ الصلوٰۃ والسّلام

زینتِ عرشِ مُعلّیٰ الصلوٰۃ والسّلام

 

رب ہب لی امتی کہتے ہوئے پیدا ہوئے

حق نے فرمایا کہ بخشا الصلوٰۃ والسّلام

 

دست بستہ سب فرشتے پڑھتے ہیں ان پر درود

کیوں نہ ہو پھر ورد اپنا الصلوٰۃ والسّلام

 

مومنو پڑھتے نہیں کیوں اپنے آقا پر درود

ہے فرشتوں کا وظیفہ الصلوٰۃ والسّلام

 

بت شکن آیا یہ کہہ کر سر کے بل بت گر گئے

جُھوم کر کہتا تھا کعبہ الصلوٰۃ والسّلام

 

سر جھکا کر با ادب عشق رسول اللہ میں

کہہ رہا تھا ہر ستارہ الصلوٰۃ والسّلام

 

غنچے چٹکے پھول مہکے چہچہائیں بلبلیں

گُل کھِلا باغِ اُحد کا الصلوٰۃ والسّلام

 

میں وہ ُسنّی ہوں جمیلؔ قادری مرنے کے بعد

میرا لاشہ بھی کہے گا الصلوٰۃ والسّلام

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ