اردوئے معلیٰ

Search

بخشش کا ساماں لیکے ہے آئی شب برات

شکر خدا کہ ہم نے ہے پائی شبِ برات

 

اللہ کے نبی نے منائی شبِ برات

اللہ نے بھی خوب سجائی شبِ برات

 

شب جگمگا رہی ہے تو پرنور ہے چراغ

ہر سمت نور بن کے ہے چھائی شبِ برات

 

سب مشکلیں ٹلیں گی تمہاری دعا کرو

رحمت خدا کی لے کے ہے آئی شبِ برات

 

رو رو کے گڑ گڑا کے خدا کو مناؤ تم

موقع یہ مغفرت کا ہے لائی شبِ برات

 

رب کے کرم سے کوئی بھی محروم ہی نہیں

بارش کرم کی ایسی ہے لائی شبِ برات

 

آپس کے اختلاف بھلاو گلے ملو

تم سے خفا نہ ہو کوئی بھائی شبِ برات

 

قسمت کے تارے چمکیں گے اس شب تمہارے بھی

توبہ کرو خطا سے جو پائی شب برات

 

ہوگی مدد تمہاری بھی اس رات میں سنو

بندوں کے واسطے مسیحائی شب برات

 

بدکار ہوں زمانے کا مجرم بھی ہوں بہت

میرے بھی دل کی کر دے صفائی شبِ برات

 

میرے گناہ بخشے گا رب تیرے واسطے

بندوں کی لاج تونے بچائی شبِ برات

 

شاہد پڑھو درود عبادت کی شب ہے یہ

رب نے نبی کے صدقے بنائی شب برات

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ