تاجِ توصیفِ نبی بر سرِ ایمان چڑھا !
اتنا سر پر نہ غزل کو اے غزل خوان چڑھا !
صرف محفل پہ نہ رنگ ان کے ثنا خوان چڑھا !
بامِ سیرتِ پہ مہِ اسوۂِ حَسّان چڑھا !
مصحفِ رخ پہ چمکتا ہے عَرَق ، یوں کہیے
’’ واہ کیا خوب ہے سونا سرِ قرآن چڑھا ‘‘
پہلے ملبوسِ بشر تن سے اتارا اس نے
مرکبِ نور پہ پِھر نور کا مہمان چڑھا
چشمِ نم ، عشقِ نبی ،سوز ہے پُشتوں سے نصیب
لِ
لّہ الحمد میں توصیف میں پروان چڑھا
خارِ صحرائے عرب ! تیری ثناوں کے طفیل
میرے دیوان پہ ہے رنگِ گلستان چڑھا
معنیِ نعتِ شہِ عرش ہے اونچا ، جبریل !
طفلِ خامہ کو مِرے بر سرِ اِمکان چڑھا !
قائلِ حرفِ "اَتَجعَل” جو ہوئے تھے ، دیکھیں
زینۂ ” ثُمّ دَنا ” پر کوئی انسان چڑھا
داعیِٔ وصل کی امّت ہے گروہوں میں بٹی
آستیں اب تو نہ اے واعظِ نادان چڑھا !
جب بھی سرگرمِ نوازش ہوا محبوب کوئی
اور کچھ نشّۂِ وصلِ شہِ ذیشان چڑھا
نوحِ توصیف سے پائی ہے بقا ، ورنہ تھا
قریۂ حرف پہ تخریب کا طوفان چڑھا
دید سرکار کی منزل ہے معظمؔ تیری
خواہشِ نفس کو اس رہ میں نہ پروان چڑھا !
