اردوئے معلیٰ

Search

 

تمام دہر کے آلام سے نجات ہوئی

حضور آپ کی جب چشمِ التفات ہوئی

 

مجھے تو سلکِ مراتب میں اتنا علم ہے بس

خدا کے بعد حبیبِ خدا کی ذات ہوئی

 

صفاتِ باری تعالی کی مظہرِ کامل

وہی ہے ذات جو گنجینہء صفات ہوئی

 

جب آئے خیر کی خیرات بانٹنے والے

زمانے بھر کی شر انگیزیوں کو مات ہوئی

 

ظہورِ حسنِ رخِ سید الوریٰ جو ہوا

تجلیات سے تابندہ کائنات ہوئی

 

وہاں سبھی کو مدینہ ہی یاد آیا ہے

جہاں بھی گوشہء امن و اماں کی بات ہوئی

 

طلوع نعت کا سورج ہوا تخیل میں

حریمِ قلب میں حافظ کبھی نہ رات ہوئی

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ