اردوئے معلیٰ

Search

تیرا وصال اور فقط دل کے دام پر

ایسی عنایتیں نہیں کرتے غلام پر

 

میں نے سپردِ خاک سبھی رنگ کر دیے

خاکہ سا رہ گیا مرے چہرے کے نام پر

 

پھر یوں ہوا ، کسی نے تعارف کرا دیا

سر دُھن رہے تھے لوگ وگرنہ کلام پر

 

پھیلی شفق تو عارضِ گُل پوش ہو گئی

لب رکھ دیے ہیں تیرے فقیروں نے شام پر

 

مصروفِ رقصِ مرگ ہے مجذوبِ آرزو

تُو بے حجاب محوِ تماشہ ہے بام پر

 

الجھے رہے رکاب میں لاشے کے پَیر بھی

تھے ہاتھ وقتِ مرگ بھی میرے لگام پر

 

سینے سے آندھیوں کا بدن چیرتا رہا

جب تک کہ جھڑ نہیں گئے ناصر تمام ، پَر

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ