اردوئے معلیٰ

Search

جد نین فقیراں دے بن گئے طیبہ دے گولے چپ کر کے

کر کوچ گئے تن من وچوں درداں دے ٹولے چپ کر کے

 

میں صدقے زلف گھٹاواں توں نیناں دے ناز اداواں توں

جد پچھیا دل کنج لُٹدے او، ہولی جئے بولے چپ کر کے

 

میں محمد بن عبد اللہ بن عبد المطلب بن ہاشم آں

جد آپ نیں ایہ کہیا ، نس گئے سبھ کافر ٹولے چپ کر کے

 

میں غم دا روگ مٹائی رکھناں یاداں دی چوگ چگائی رکھناں

روح پنچھی تیریاں واٹاں لئی پر ماہی تولے چپ کر کے

 

طیبہ دی فضا دا واسی آں نئیں خوف قضا دا بھورا وی

سِر سٹ کے دوروں ٹپ جاندے ہجراں دے جھولے چپ کر کے

 

مکھ نوری تکنا چاہندا اے پر جھُکدا جھَکدا راہندا اے

دل دل وچ ہوندا راہندا اے دل ڈانواں ڈولے چپ کر کے

 

اعجازؔ کمال توں کر چھوڑے پتھراں دے لعل توں کر چھوڑے

نعتاں دے نال توں بھر چھوڑے ایہ شعر بھڑولے چپ کر کے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ