اردوئے معلیٰ

Search

جذبۂ شوق! انتہا کر دے

ہر تمنا کو بے صدا کر دے

 

قید اپنی انا کے بُت میں ہوں

کوئی توڑے مجھے رہا کر دے

 

عمر گزری مری کٹہرے میں

زندگی اب تو فیصلہ کر دے

 

قد گھٹا دے مری نظر میں مرا

یا الٰہیٰ مجھے بڑا کر دے

 

فخر کرتی ہے آدمی پہ حیات

جب کسی کا کوئی بھلا کر دے

 

میرے سر پر نہیں رہے ماں باپ

کوئی میرے لئے دعا کر دے

 

ہے مبارک وہ سانحہ جو ظہیؔر

بے نواؤں کو ہم نوا کر دے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ